ДИДЕД ЧIАЛ — ДИДЕДИН ДЕРЕЖАДА
Пака зи чIал квахьиз хьайитIа, зун къе рекьиз гьазур я.
Расул ГЬАМЗАТОВ.
21-февраль милли чIаларин Югъ тир. И лишанлу датадиз талукь яз 19-февралдиз центральный ва жаванрин библиотекайри Ахцегьрин 1-нумрадин СОШ-дихъ галаз мярекат кьиле тухвана. Ам гьа и школадин лезги чIалан муаллим У.Мисиевади ачухна ва ада кьилени тухвана. У.Мисиевади дидед чIалакай суьгьбетна, ам хуьн чи кьилин везифайрикай сад тирди къейдна. Серенжемдин иштиракчийриз еке экрандал лезги писателрин, шаиррин шикилриз килигдай мумкинвал авай.
Школадин аялри лезги чIал хуьниз талукьарнавай мисалар гъана, шиирар кIелна. Абуру гьакI Сакъур Къурбанан «Маса гайи Меседу» ктабдай гьазурнавай тамашадай са чIук къалурна. Тамашада школадин ученикар тир Суфьян Тагьирова, Асланбег Мугъулова, Абдуллагь Къурбанова, Каминат Умудхановади, Раина Гъаниевади, Шамсият Эфендиевади, Фатима Ризехановади, Маиса Уружалиевади, Зарина Къугьмазовади, Ханум Тагьировади, Мадина Нурмегьамедовади, Юрик Эмирова ва Гуьлназ Асаевади ашкъидалди иштиракна.
Идалай гуьгъуьниз гаф райондин библиотекадин массовый кIвалахдин рекьяй заведующий Гуьлжагьан Гъаниевадиз гана. Ада жегьилриз лезги чIалаз гьуьрмет авуниз, ам дидедин дережада эцигуниз эверна. Инал гьакI библиотекарь Магьи Фетуллаевани рахана. Ада аялриз вичи лезги чIалаз бахшна туькIуьрнавай шиирни кIелна. Мярекатдин эхирдай Ахцегьрин 1-нумрадин СОШ-дин директор С.Мамаева рахана. Ада аялривай лезги чIал хъсандиз чирун, адан михьивал хуьн, чIалаз гьуьрмет авун тIалабна ва ихьтин метлеблу серенжем тешкилунай ва тухунай лезги чIалан муаллим У.Мисиевадиз чухсагъул лагьана.
